La Parola : Ôrs
24973

definicion : Èrmito, pèrsona bien simpla et discrèta, il èvangélisat la règ•ion de Digne. Opositor de l’arianismo, il sè dèdiyét a la preyére et a la charitât. Il servessét Sènt Jocondo, èvèque d’Aoûta, coment archidiâcro. Quand Plocèan, un arièn, devint èvèque d’Aoûta, Ôrs et d’ôtros quitèront la catèdrâla d’Aoûta et s’enstalèront sur lo sito actuèl de Sènt-Ôrs, qu’il sè trove u centro du bôrg de Sènt-Ôrs, fasent en maniére que lo centro de la Vela d'Aoûta usse doux polos. Ceta division de la citât nos est parvegnua tant qu'u jorn d’houé. Selon la tradicion, il aprét ux ayassins l'ârt de la gravura des sabôts : les sabôtiérs d'Ayâs sont enqu’houé cognus pertot en Vâl d'Aoûta por lyor habilètât. Nos disposens pas de donâs cèrtins a propôs de sa môrt, mas la data semble étre prècisa: lo premiér de février. Il est lo sent-patron de bien de comenes vâldotênes, et lo sent lo ples populèro en Vâl d'Aoûta. Il est fétâ lo 1ér de février en Vâl d'Aoûta, lo 17 de jouen dens d'ôtres règ•ions. Il semble tot-un que l'origina irlandêsa de Sent Ôrs seye una pura envencion du chanouèno et hagiografo Jean Ludovic Vaudan (1554). En èfèt nion tèxto liturgico ou historico antèrior a ceta data fêt rèfèrence a ceta origina gaèlica. Sent Ôrs est cognu per doux documents: Una via du IX/Xémo sièclo que apartint u codex de l'Abayie de Farfa ècrita d’un èclèsiastico vâldotên vers la fin du VIIIémo et l’envion du IXémo sièclo et un second tèxto enclus dens lo lègendèro du XIIIémo sièclo de la Colègiâla et qu’ill remonte u XI/XIIémo sièclo.